სამუშაო ძალის მობილობა კონკურენციისა და ეკონომიკური ზრდის მნიშვნელოვანი მამოძრავებელი ძალაა. დასაქმებულის თავისუფლება, შეიცვალოს სამსახური ან დაიწყოს საკუთარი ბიზნესი, ხელს უწყობს ანაზღაურებისა და სამუშაო პირობების გაუმჯობესებას, აფართოებს კვალიფიციური კადრების ბაზას და ახალისებს მეწარმეობას.
დღეს გამოქვეყნებულ ღია წერილში კონკურენციის კომისრის მოვალეობის შემსრულებელი, ჟან პრატი, პროვინციებისა და ტერიტორიების მინისტრებს მოუწოდებს, ხელი შეუწყონ შრომის ბაზარზე კონკურენციის გაზრდას არაკონკურენციის შეთანხმებების (ე.წ. non-compete პირობების) გამოყენების შეზღუდვის გზით.
არაკონკურენციის შეთანხმებები დასაქმებულებს სამსახურიდან წასვლის შემდეგ გარკვეული პერიოდით უკრძალავს კონკურენტ კომპანიაში გადასვლას ან კონკურენტული ბიზნესის დაწყებას. როგორც წესი, ეს პირობა კონფიდენციალური ინფორმაციის ან კლიენტებთან ურთიერთობის დასაცავად გამოიყენება. თუმცა, ეკონომიკური თანამშრომლობისა და განვითარების ორგანიზაციის (OECD) მიერ კანადაში ჩატარებულმა კვლევებმა აჩვენა, რომ მსგავსი შეთანხმებები ფართოდ არის გავრცელებული, სულ უფრო ხშირად გამოიყენება და ხშირად ვრცელდება ისეთ პოზიციებზეც, სადაც ამის რეალური საჭიროება არ არსებობს. აღნიშნული პირობები ეხება დასაქმებულთა ფართო სპექტრს, მათ შორის ვადიანი კონტრაქტით მომუშავე პირებს, დაბალანაზღაურებად პოზიციებზე დასაქმებულებსა და იმ თანამშრომლებს, რომლებსაც კონფიდენციალურ ინფორმაციაზე წვდომა საერთოდ არ აქვთ. მიუხედავად იმისა, რომ კანონმდებლობით ასეთი პუნქტები ხშირად იურიდიული ძალის არმქონეა, ისინი მაინც აფერხებენ ადამიანებს, ეძიონ უკეთესად ანაზღაურებადი სამსახური ან წამოიწყონ საკუთარი საქმე.
ონტარიოს პროვინციამ და ფედერალურმა მთავრობამ არაკონკურენციის შეთანხმებების შესაზღუდად ნაბიჯები უკვე გადადგეს. კონკურენციის ბიურო სხვა პროვინციებსა და ტერიტორიებსაც მოუწოდებს, აჰყვნენ ამ ტენდენციას და შრომისა და დასაქმების კანონმდებლობაში შესაბამისი რეფორმები გაატარონ.
წყაროს ნახვა